Yang Zi៖ ពីក្មេងស្រីដែលគេបង្អាប់ថា "អាក្រក់" ក្លាយជាម្ចាស់ក្សត្រីនៃរឿងភាគ

ពីក្មេងស្រីដែលគេមើលងាយ មកជាតារាស្រីលំដាប់កំពូល

នៅក្នុងវិស័យសិល្បៈដែលមានការប្រកួតប្រជែងខ្ពស់ យ៉ាង ជឺ (Yang Zi) ត្រូវបានគេចាត់ទុកថាជាតារាកុមារម្នាក់ក្នុងចំណោមតារាកុមារដែលទទួលបានជោគជ័យបំផុតក្នុងការផ្លាស់ប្តូរខ្លួនមកជាតារាពេញវ័យ (Child star to A-list actress transformation )។ គាត់បានឈានជើងចូលក្នុងវិស័យសិល្បៈតាំងពីអាយុ ៥ ឆ្នាំ សម្ដែងជាតួឯកក្នុងរឿងភាគនៅអាយុ ៨ ឆ្នាំ មានឈ្មោះបោះសំឡេងនៅអាយុ ១២ ឆ្នាំ ហើយបានល្បីល្បាញខ្លាំងបំផុតនៅអាយុ ២៤ ឆ្នាំ។ គេអាចនិយាយបានថា មាគ៌ាសិល្បៈរបស់គាត់ហាក់បីដូចជាមានភាពរលូន និងមានលំនឹងជាលំដាប់។

ប៉ុន្តែនៅក្នុងទស្សនៈរបស់គាត់ផ្ទាល់វិញ បែរជាមិនដូច្នោះទៅវិញ។ គាត់ធ្លាប់បានធ្វើការវាយតម្លៃ និងពោលពាក្យជាសាធារណៈអំពីខ្លួនឯងថា៖ «ខ្ញុំមានអារម្មណ៍ថា ខ្លួនឯងគឺជាតារាកុមារម្នាក់ដែលឯកោ និងធ្លាក់ក្នុងសភាពស្ងប់ស្ងាត់បំផុត»។ ទោះបីជាគាត់រស់នៅក្រោមពន្លឺនៃភាពល្បីល្បាញក៏ពិតមែន ប៉ុន្តែនៅលើវិថីមួយនេះគឺពោរពេញទៅដោយបន្លា និងឧបសគ្គរារាំងយ៉ាងច្រើនសន្ធឹកសន្ធាប់។

ក្ដីស្រមៃដំបូង និងការចាប់ផ្ដើមក្នុងវ័យ ៥ ឆ្នាំ

យ៉ាង ជឺ ចាប់ផ្ដើមប៉ះពាល់ការសម្តែងដំបូងបង្អស់ គឺនៅក្នុងឆ្នាំដែលគាត់មានអាយុ ៥ ឆ្នាំ។ កាលនោះ គាត់កំពុងមើលរឿង «ព្រះនាងយេយេ» នៅផ្ទះ ហើយក៏ស្រឡាញ់ពេញចិត្តតារាសម្តែង ចៅ វី (Vicky Zhao) ភ្លាមៗតែម្តង។ គាត់ធ្លាប់ប្រាប់ថា៖ «ខ្ញុំចូលចិត្តរឿងនោះខ្លាំងណាស់ ហើយក៏ចូលចិត្តអាយដល (Idol) ចៅ វី ដែរ ខ្ញុំស្រមៃចង់ក្លាយជាដូចគាត់»។ គឺបំណងប្រាថ្នាមួយនេះហើយ ដែលបានជួយជ្រោមជ្រែងឱ្យគាត់ធំធាត់ឡើងក្នុងរយៈពេលជាច្រើនឆ្នាំបន្តបន្ទាប់មកទៀត។

គាត់បានប្រាប់ពីគំនិតនេះទៅកាន់ឪពុកម្តាយ ហើយពួកគាត់ក៏យល់ស្របតាម ជាពិសេសគឺឪពុករបស់គាត់ដែលបានជួយចុះឈ្មោះឱ្យគាត់ចូលរៀននៅមជ្ឈមណ្ឌលកុមារ ដើម្បីសិក្សាផ្នែកសម្តែង។ នៅទីនោះ គាត់មិនមែនជាក្មេងដែលស្អាតដាច់គេទេ ប៉ុន្តែគាត់គឺជាក្មេងដែលខិតខំប្រឹងប្រែងបំផុត។

ថ្ងៃមួយ មានអ្នកដឹកនាំរឿងម្នាក់មកសាលាដើម្បីជ្រើសរើសតួអង្គ។ ពេលមកដល់ក្នុងថ្នាក់ គាត់បានសម្លឹងមើលមួយជុំ រួចក៏សម្លឹងចំទៅកាន់ យ៉ាង ជឺ ហើយពោលថា៖ គឺគាត់ហ្នឹងហើយ។ តាមរយៈហេតុការណ៍នេះ គាត់ក៏បានចាប់ផ្តើមវិថីសម្តែងរបស់ខ្លួន។ គាត់ធ្លាប់រំឭកថា៖ «អ្នកដឹកនាំរឿងយល់ថាខ្ញុំមើលទៅគួរឱ្យស្រឡាញ់ ទើបគាត់សម្រេចចិត្តជ្រើសរើសយកខ្ញុំ»។ កាលនោះ គាត់រំភើបចិត្តរហូតគេងមិនលក់ពេញមួយយប់។

នៅព្រឹកព្រលឹមថ្ងៃបន្ទាប់ ឪពុករបស់គាត់បាននាំគាត់ទៅកន្លែងថតរឿង។ ពេលទៅដល់ គាត់ឃើញមនុស្សកកកុញ។ កាលនោះជារដូវរងា ឪពុករបស់គាត់បានឱបគាត់ជាប់នឹងទ្រូងដើម្បីឱ្យមានភាពកក់ក្តៅ និងឈរតម្រង់ជួរនៅខាងក្រោយគេដើម្បីរង់ចាំ។ បន្ទាប់ពីរង់ចាំអស់រយៈពេលយ៉ាងយូរ ទើបមានគេហៅឈ្មោះឱ្យចូលទៅ។ ពេលនោះទើបគាត់ដឹងថា ខ្លួនឯងត្រូវសម្តែងជាតួអង្គបន្ទាប់បន្សំ ដែលគ្មានសូម្បីតែសម្តីមួយម៉ាត់ គឺគ្រាន់តែដើរចុះដើរឡើងនៅក្នុងហាងលក់គ្រឿងអគ្គិសនី និងធ្វើកាយវិការដដែលៗអស់ពេញមួយថ្ងៃ។

ទោះជាស្តាប់ទៅខ្លោចផ្សា ប៉ុន្តែសម្រាប់ យ៉ាង ជឺ គាត់នៅតែមានក្តីសុខខ្លាំងណាស់៖ ទោះបីជាបែបនោះក៏ដោយ ក៏ខ្ញុំយល់ថាវាគឺជាបទពិសោធន៍ដ៏ស្រស់ស្អាតបំផុតមួយ និងសប្បាយរីករាយខ្លាំងណាស់។

ការលះបង់របស់គ្រួសារ និងការតស៊ូដាក់ពាក្យសម្តែង

ចាប់តាំងពីពេលនោះមក ម្តាយរបស់គាត់បានឈប់ពីការងារដើម្បីមកមើលថែគាត់ពេញម៉ោង ចំណែកឯឪពុកវិញធ្វើជាអ្នកចាត់ការផ្ទាល់ខ្លួន ឱ្យគាត់ផង។ ឪពុកតែងតែនាំគាត់ រួមជាមួយឯកសារប្រវត្តិរូប យ៉ាងក្រាស់ឃ្មឹក ដើរដាក់ពាក្យតាមបណ្តាផលិតកម្មធំៗនៅក្នុងទីក្រុងប៉េកាំង ដើម្បីសាកល្បងសម្តែង មិនចេះឈប់ឈរ។

ប៉ុន្តែវិធីសាស្ត្របែបនេះ កម្រនឹងជួបប្រទះនូវរឿងភាគល្អៗណាស់។ ប្រសិនបើមានសំណាងល្អ ក៏ជួបអ្នកដឹកនាំរឿងដែលចិត្តល្អឱ្យសាកសម្តែងមួយឈុត ប៉ុន្តែបើមិនពេញចិត្តវិញ គេនឹងគ្រវែងឯកសារទាំងនោះចូលក្នុងធុងសម្រាមភ្លាមៗតែម្តង។ ដោយសារគ្មានខ្នងបង្អែក ឬអ្នកជ្រោមជ្រែង ភាគច្រើនគាត់សម្តែងត្រឹមតែជាតួអង្គបន្ទាប់បន្សំ និងថតពាណិជ្ជកម្ម តូចតាចប៉ុណ្ណោះ។

រហូតមកដល់ឆ្នាំ ១៩៩៨ ជីវិតរបស់គាត់ចាប់ផ្តើមមានពន្លឺសង្ឃឹមឡើងវិញ តាមរយៈការចូលរួមសម្តែងក្នុងរឿងភាគដទៃទៀត ដែលជាការបើកផ្លូវឱ្យគាត់ឈានជើងចូលក្នុងរង្វង់សិល្បៈភាពយន្តជាផ្លូវការ។

របត់ជីវិតក្នុងរឿង (Home with Kids)

នៅក្នុងឆ្នាំ ២០០៤ រឿងភាគកំប្លែងបែបគ្រួសារ (Home with Kids) បានអញ្ជើញគាត់ឱ្យមកសម្តែងជាតួអង្គ សៀ សៀ។ ការដែលគាត់ទទួលបានតួអង្គនេះ គឺជារឿងចៃដន្យសុទ្ធសាធ។ ដើមឡើយ ក្រុមការងារចង់ឱ្យគាត់សម្តែងជាតួអង្គមិត្តរួមថ្នាក់ប៉ុណ្ណោះ ប៉ុន្តែពេលអ្នកដឹកនាំរឿងឃើញគាត់ដែលមានកម្ពស់ ១ ម៉ែត្រ ៦២ គាត់ក៏សម្រេចចិត្តឱ្យ យ៉ាង ជឺ សម្តែងជាតួឯកតែម្តង។

នេះគឺជាតួឯកស្រី លើកដំបូង ប៉ុន្តែបញ្ហាក៏កើតឡើង ព្រោះគាត់មិនដែលប៉ះពាល់រឿងកំប្លែងទាល់តែសោះ។ នៅកន្លែងថតរឿង មិត្តរួមអាជីពផ្សេងទៀតសុទ្ធតែអាចចូលតួបានយ៉ាងល្អ មានតែគាត់ម្នាក់គត់ដែលធ្វើមិនបាន។ លើសពីនេះ តារាជើងចាស់ សុង ដាន់ដាន់ (Song Dandan) តែងតែផ្លាស់ប្តូរអត្ថបទរឿង ភ្លាមៗ ដែលធ្វើឱ្យគាត់តានតឹងខ្លាំង រហូតលួចទៅពួនយំម្នាក់ឯង។

មានថ្ងៃមួយ អ្នកផលិតកម្មវិធី បានមកពិភាក្សាជាមួយក្រុមការងារ ធ្វើឱ្យគាត់ភ័យខ្លាចខ្លាំងដោយសង្ស័យថាគេនឹងដូរគាត់ចេញ។ គាត់បានពួនស្តាប់នៅខាងក្រៅបន្ទប់ប្រជុំទាំងបារម្ភ ប៉ុន្តែជាសំណាងល្អ គាត់ត្រូវបានគេរក្សាទុក។ ភាពភ័យខ្លាចនេះបានធ្វើឱ្យគាត់កាន់តែខិតខំប្រឹងប្រែង ដាក់ចិត្តដាក់កាយឱ្យរលាយចូលទៅក្នុងតួអង្គ (Immerse in character)។ ទីបំផុត តួអង្គ សៀ សៀ បានធ្វើឱ្យគាត់ល្បីល្បាញពាសពេញប្រទេសក្នុងអាយុ ១២ ឆ្នាំ។

វិបត្តិរូបសម្រស់ និងការរិះគន់ក្នុងវ័យ ១៤ ឆ្នាំ

ទោះបីជាល្បីល្បាញ ប៉ុន្តែ យ៉ាង ជឺ តែងមានអារម្មណ៍អន់ចិត្តនឹងខ្លួនឯង ព្រោះគាត់យល់ថាខ្លួនឯងមិនស្អាត។ មានពេលមួយ គាត់យករូបថតកាលពីក្មេងទៅបង្ហាញឱ្យបុគ្គលិកមើល ប៉ុន្តែពួកគាត់បែរជានិយាយថា៖ «មេឃពិតជាមិនអយុត្តិធម៌ចំពោះអ្នកពេកទេ!» (មានន័យថា រូបរាងបែបនេះតែអាចល្បីបាន គឺជារឿងចៃដន្យ)។

ឈានចូលដល់វគ្គ៣ នៃរឿង (Home with Kids) គាត់មិនបានចូលរួមសម្តែងឡើយដោយសារត្រូវត្រៀមប្រឡង។ ចាប់ពីពេលនោះមក គាត់ហាក់បាត់បង់បង្អែក។ ចំពេលដែលគាត់ស្ថិតក្នុងវ័យពេញវ័យផ្លាស់ប្តូររូបរាង គាត់ចាប់ផ្ដើមមានសាច់ធាត់ និងមានមុនពេញផ្ទៃមុខ។ គ្មានអ្នកដឹកនាំរឿងណាម្នាក់ចង់ហៅគាត់ទៅសម្តែងឡើយ។ គាត់ជួបប្រទះនូវវិបត្តិអាជីពតាំងពីក្មេង (Mid-career crisis)។

បន្ទាប់ពីជួបការលំបាក គាត់ក៏ផ្ដោតលើការរៀនសូត្រ ដោយជួលគ្រូបង្គោល ៤ នាក់មកបង្រៀនតាំងពីម៉ោង ៧ ព្រឹក ដល់ម៉ោង ៩ យប់ និងរៀនបន្តដល់ម៉ោង ៣ ទៀបភ្លឺ។ នៅពេលចង់ប្រឡងចូលមហាវិទ្យាល័យភូមិន្ទវិចិត្រសិល្បៈប៉េកាំង (Beijing Film Academy) គាត់បានសួរអ្នកស្រី សុង ដាន់ដាន់ ពីយោបល់។ អ្នកស្រីបានប្រាប់ត្រង់ៗថា៖

«កូនអើយ រូបរាងកូនបែបនេះ... កុំបន្តការសម្តែងអី។ ក្នុងរង្វង់សិល្បៈនេះមានក្មេងស្រីស្អាតៗច្រើនណាស់ ចំណែកកូនសម្រស់មិនស្អាតទេ ម៉ាក់ខ្លាចថាទៅថ្ងៃមុខកូននឹងត្រូវខូចចិត្ត»។

ទោះបីជាត្រូវគេវាយតម្លៃបែបនេះ ក៏គាត់នៅតែតាំងចិត្តមិនបោះបង់។ ទីបំផុត គាត់បានប្រឡងជាប់ និងក្លាយជានិស្សិតមហាវិទ្យាល័យសម្តែងជាស្ថាពរ។

ការរើខ្លួនចេញពីឈ្មោះ "តារាកុមារ"

ក្រោយចូលរៀន គាត់បានរត់ចុះឡើងតាមក្រុមថតរឿងជានិច្ច ទោះជាតួបន្ទាប់បន្សំក៏ទទួលយកដែរ។ រហូតដល់ឆ្នាំទីពីរ គាត់ទទួលបានឱកាសក្នុងរឿងថ្មី ដែលធ្វើឱ្យសាធារណជនទទួលស្គាល់ថា គាត់បានរើខ្លួនចេញពីភាពជាតារាកុមារបានយ៉ាងជោគជ័យ។

ស្នាដៃបន្ទាប់ៗមកទៀតបានជួយឱ្យគាត់ទទួលបានពានរង្វាន់តារាថ្មីឆ្នើម។ ជាពិសេស រឿងភាគសង្គ្រាម (Battle of Changsha) បានធ្វើឱ្យអ្នកក្នុងរង្វង់សិល្បៈកោតសរសើរមិនដាច់ពីមាត់។ គាត់ចាប់ផ្តើមរៀនចេះក្តោបក្តាប់ម្ចាស់ការលើខ្លួនឯង និងជជែកវែកញែកពីសាច់រឿង ជាមួយអ្នកដឹកនាំរឿង។

ដើម្បីសម្តែងរឿង «Yangko Dance» គាត់សុខចិត្តស្នាក់នៅក្នុងក្រុមថតរឿងអស់រយៈពេលមួយឆ្នាំពេញ ដើម្បីសិក្សាស្រាវជ្រាវតែលើរឿងមួយនេះប៉ុណ្ណោះ (Quality over quantity)។

ការប្រយុទ្ធនឹងការរិះគន់ 

បន្ទាប់ពីថតរឿង «Yangko Dance» ចប់ គាត់តែងតែត្រូវគេរិះគន់ថា "អាក្រក់" ឬ "ធាត់" ជានិច្ច។ មនុស្សខ្លះនិយាយចំៗមុខថា៖ «ហេតុអ្វីបានជាធាត់ម្ល៉េះ? រូបរាងបែបហ្នឹងហើយ នៅមានមុខមកចូលរួមកម្មវិធីទៀត»។ គាត់ឈឺចាប់ខ្លាំង ប៉ុន្តែបានប្រដៅខ្លួនឯងថា៖ «ធ្វើជាសិល្បករម្នាក់មិនត្រូវមានចិត្តដែលងាយស្រួលនឹងប្រេះស្រាំដូចកញ្ចក់នោះទេ (Fragile/Glass-hearted)»។

គាត់បានសម្រេចចិត្តសម្រកទម្ងន់អស់ពីសមត្ថភាព។ ក្នុងកម្មវិធីទូរទស្សន៍ គាត់ធ្លាប់ឃ្លានខ្លាំងរហូតលួចញ៉ាំអាហារ ប៉ុន្តែចុងក្រោយបែរជាយកដៃខ្វេះដើម្បីក្អួតវាចេញវិញ ព្រោះខ្លាចធាត់។

លើសពីនេះ គាត់ត្រូវជួបបញ្ហាបាត់បង់តួអង្គភ្លាមៗដោយសារគាត់មិនទាន់មានតម្លៃពាណិជ្ជកម្មខ្ពស់។ មានរឿងខ្លះគាត់ត្រៀមខ្លួន ២ ខែ តែដល់ថ្ងៃថតបែរជាគេដូរតួចេញ។ គាត់បានដឹងថា៖ «ក្នុងនាមជាតារាសម្តែងម្នាក់ អ្នកត្រូវតែមានតម្លៃពាណិជ្ជកម្ម បើមិនដូច្នោះទេ អ្នកនឹងត្រូវគេដូរចេញជាមិនខាន»។

ភាពជោគជ័យដ៏កំពូល

រហូតមកដល់ឆ្នាំ ២០១៥ គាត់ទទួលបានឱកាសក្នុងរឿង (Ode to Joy) ក្នុងតួអង្គ ឈីវ អ៊ីងអ៊ីង។ ដើម្បីតួអង្គនេះ គាត់សុខចិត្តឡើងទម្ងន់ និងញ៉ាំនំបុ័ងសូកូឡាអស់ ១១ នំបុ័ងក្នុងប្លង់តែមួយ។ លទ្ធផលគឺគាត់ល្បីខ្លាំងមែនទែន រហូតមានការជជែកដេញដោលពេញបណ្តាញសង្គម។

បន្ទាប់មក គាត់បានតស៊ូសម្តែងជាតួឯកស្រីត្រជាក់ដូចទឹកកកក្នុងរឿង (Noble Aspirations)។ ទោះបីត្រូវគេរិះគន់ថា "មិនស្អាតស័ក្តិសម" ក៏គាត់ខិតខំហ្វឹកហាត់ឈុតវាយតប់ជារៀងរាល់ថ្ងៃ រហូតរបួសពេញខ្លួន ក៏មិនព្រមសម្រាក។

មកទល់ពេលនេះ យ៉ាង ជឺ បានក្លាយជាតារាស្រីលំដាប់កំពូល។ រឿងភាគល្បីៗដូចជា (Ashes of Love) និង (Go Go Squid!) បានធ្វើឱ្យគាត់ក្លាយជាតារាដែលមហាជនគោរពស្រឡាញ់បំផុត។

យ៉ាង ជឺ បានបង្ហាញឱ្យឃើញថា ភាពជោគជ័យមិនមែនបានមកដោយចៃដន្យទេ ប៉ុន្តែវាបានមកពីការតស៊ូមិនរាថយ។ គាត់បាននិយាយថា៖ «ដើម្បីផ្លាស់ប្តូរការយល់ឃើញរបស់មហាជន គឺត្រូវប្រើការសម្តែងជាអ្នកនិយាយជំនួសវិញ។ ការផ្សព្វផ្សាយទាំងឡាយគឺគ្មានន័យទេ ប្រសិនបើគ្មានស្នាដៃពិតប្រាកដ»។

ចុះសម្រាប់អ្នកវិញ តើអ្នកយល់យ៉ាងណាដែរចំពោះដំណើរជីវិតរបស់ Yang Zi? តើអ្នកធ្លាប់ជួបនូវឧបសគ្គដែលធ្វើឱ្យអ្នកចង់បោះបង់ដូចគាត់ដែរឬទេ? ហើយក្នុងចំណោមរឿងភាគទាំងអស់របស់គាត់ តើមួយណាដែលអ្នកស្រឡាញ់ជាងគេ? ខមិនឈ្មោះរឿងដែលអ្នកចូលចិត្តខាងក្រោម!

កុំភ្លេចចូលរួមបញ្ចេញមតិនៅខាងក្រោម ដើម្បីចែករំលែកទស្សនៈរបស់អ្នក! ពិសេស កុំភ្លេចចុច Follow ដើម្បីរង់ចាំអានអត្ថបទជក់ចិត្តក្រោយៗទៀត!

Teacup Studio 🍵